ਪਿੰਡ ਦੀ ਨੁਹਾਰ ਬਦਲਣ ਲਈ ਸ੍ਰੀ ਗੁਰੂ ਰਵਿਦਾਸ ਸੇਵਾ ਸੁਸਾਇਟੀ ਨੇ ਪਿੰਡ ’ਚ ਲਗਾਏ ਬੈਂਚ

ਬਾਲ ਕਿਸ਼ਨ

ਫ਼ਿਰੋਜ਼ਪੁਰ, 13 ਸਤੰਬਰ–ਪਿੰਡ ਦੀ ਨੁਹਾਰ ਬਦਲਣ ਅਤੇ ਸਾਫ਼–ਸੁਥਰਾ ਰੱਖਣ ਦੇ ਮੰਤਵ ਤਹਿਤ ਸ੍ਰੀ ਗੁਰੂ ਰਵਿਦਾਸ ਸੇਵਾ ਸੁਸਾਇਟੀ ਦੇ ਨੌਜਵਾਨਾਂ ਵਲੋਂ ਪਿੰਡ ਦੀਆਂ ਵੱਖ–ਵੱਖ ਥਾਵਾਂ ’ਤੇ ਜਿੱਥੇ ਲੋਕ ਥੱਕ–ਹਾਰ ਕੇ ਅਰਾਮ ਨਾਲ ਬਹਿ ਸਕਣ ਲਈ ਬੈਂਚ ਲਗਾਏ ਗਏ। ਇਸ ਸਬੰਧੀ ਸੁਸਾਇਟੀ ਦੇ ਪ੍ਰਧਾਨ ਜਗਦੀਸ਼ ਕੁਮਾਰ ਨੇ ਦੱਸਿਆ ਕਿ ਹਲਕਾ ਵਿਧਾਇਕ ਰਜਨੀਸ਼ ਦਹੀਯਾ ਦੀ ਪ੍ਰੇਰਨਾ ਸਦਕਾ ਸੁਸਾਇਟੀ ਦੇ ਨੌਜਵਾਨਾਂ ਵਲੋਂ ਆਪਣੇ ਪੱਧਰ ’ਤੇ ਪਹਿਲਾਂ ਪਿੰਡ ’ਚ ਪੌਦੇ ਲਗਾਏ ਸੀ, ਜਿਨ੍ਹਾਂ ਦੇ ਵੱਡੇ ਹੋਣ ’ਤੇ ਉਨ੍ਹਾਂ ’ਤੇ ਪੇਂਟ ਕਰਕੇ ਸੁੰਦਰ ਦਿੱਖ ਦਿੱਤੀ ਗਈ ਅਤੇ ਨਾਲ ਹੀ ਪਿੰਡ ਸਾਈਆਂਵਾਲਾ ਤੋਂ ਵਾਂ ਲਿੰਕ ਰੋਡ ਦੀ ਵੱਖ–ਵੱਖ ਥਾਵਾਂ ’ਤੇ ਇੱਟਾਂ ਨਾਲ ਪੱਕੇ ਬੈਂਚ ਬਣਾਏ ਗਏ ਤੇ ਬਾਅਦ ’ਚ ਉਨ੍ਹਾਂ ਉਪਰ ਰੰਗ–ਰੌਂਗਨ ਕਰਕੇ ਵਧੀਆ ਦਿੱਖ ਦਿੱਤੀ ਗਈ, ਜਿਸ ਨਾਲ ਆਉਣ–ਜਾਣ ਵਾਲੇ ਰਾਹਗੀਰਾਂ ਨੂੰ ਇਹ ਰੋਡ ਤੇ ਪਿੰਡ ਖ਼ਾਸ ਜਾਪੇ। ਪ੍ਰਧਾਨ ਜਗਦੀਸ਼ ਕੁਮਾਰ ਨੇ ਕਿਹਾ ਕਿ ਸੁਸਾਇਟੀ ਦੇ ਨੌਜਵਾਨਾਂ ਦੀ ਮਿਹਨਤ ਸਦਕਾ ਪਿੰਡ ’ਚ ਹੋਰ ਵੀ ਸਮਾਜਿਕ ਕਾਰਜ ਜਲਦ ਕੀਤੇ ਜਾਣਗੇ। ਇਸ ਮੌਕੇ ਲਵਪ੍ਰੀਤ ਸਿੰਘ, ਅਮਨਦੀਪ ਸਿੰਘ, ਕੁਲਵੰਤ ਸਿੰਘ, ਬਲਜੀਤ ਸਿੰਘ, ਅਸ਼ੋਕ ਕੁਮਾਰ ਆਦਿ ਹਾਜ਼ਰ ਸਨ।